Јужна Кореја изрази загриженост по веста дека Северна Кореја го егзекутирала својот втор најмоќен човек во државата, додека САД стапија во консултации со своите азиски сојузници.
Владата е длабоко загрижена и ситуацијата во Северна Кореја будно се следи се вели во соопштението на министерството за обединување задолжено за односите меѓу двете братски но, непријателски земји.
Белата куќа објави дека ги консултира своите азиски сојузници – ова е случај на екстремна бруталност на севернокорејскиот режим.
Северна Кореја соопшти дека моќниот тетин на лидерот Ким Џонг Ун е егзекутиран поради предавство. Државните медиуми објавија дека Џанг Сонг Тек, кој се сметаше за втор најмоќен човек во земјата, бил осуден на смртна казна од воениот суд.
На неговата егзекуција се гледа како на веројатно најголем пресврт во севернокорејската хиерархија, откако Ким Џонг Ун дојде на власт пред две години.
Претходно оваа недела, Џанг беше разрешен од функциите и беше обвинет за финансиски малверзации, коцкање, швалерисување и злоупотреба на дрога. Државните медиуми рекоа дека бил „полош од куче“.
Џанг се доживуваше како ментор на Ким Џонг Ун кој му помагаше да ја консолидира власта по смртта на неговиот татко Ким Џонг Ил. Џанг беше сопруг на сестрата на Ким Џонг Ил, односно тетин на актуелниот диктатор Ким Џонг Ил.