Американски официјален претставник соопшти дека Русија побарала од Кина воена опрема за употреба во инвазијата на Украина, барање што ги зголеми тензиите во врска со тековната војна а пред денешниот состанок во Рим меѓу главните соработници на владите на САД и Кина.
Пред разговорите, советникот за национална безбедност на Белата куќа, Џејк Саливан, отворено ја предупреди Кина да избегне да и помогне на Русија и да ја избегне казната од глобалните санкции што ја загрозија руската економија. „Нема да дозволиме тоа да се развива“, рече тој.
Изгледите Кина да и понуди финансиска помош на Русија е една од неколкуте грижи за претседателот Џо Бајден. Американски официјален претставник, кој сакаше да остане анонимен за да разговара за чувствителните прашања, рече дека во последните денови Русија побарала поддршка од Кина, вклучително и воена опрема, за да продолжи во тековната војна со Украина. Службеникот не даде детали за обемот на барањето кои први го објавија Фајненшл тајмс и Вашингтон пост.
Администрацијата на Бајден, исто така, ја обвинува Кина за ширење руски дезинформации што може да биде изговор за силите на рускиот претседател Владимир Путин да ја нападне Украина со хемиско или биолошко оружје.
Руската инвазија на Украина ја стави Кина во деликатна состојба со двата нејзини најголеми трговски партнери: САД и Европската унија. На Кина ѝ треба пристап до тие пазари, но таа исто така покажа поддршка за Москва, придружувајќи се со Русија во прогласувањето пријателство „ без ограничување“.