Повеќе од дваесет филмови во различни програми ќе бидат прикажани, во кината „Милениум“ и „Рамстор“, на 16. Скопски филмски фестивал. Отворањето е вечерва, во 20 часот, со премиерата на српскиот филм „Кругови“ на Срѓан Голубовиќ, кој доби награда на фестивалот „Санденс“. Режисерот ќе биде единствениот гостин што го најави фестивалот.
Премиерните прикажувања на филмовите ќе бидат во „Милениум“, а нивните репризи и документарната програма во „Рамстор“. Фестивалот ќе биде затворен со рускиот филм
„Предавство“ на Кирил Сребреников, во кој главната улога ја толкува Дејан Лилиќ.
Девет филма од поновата продукција ќе бидат прикажани од главната програма на познатите режисери како Гас Ван Сант со„Ветена земја“, Коста Гаврас со „Капиталот“, Педро Алмодовар со„Многу сум возбуден“, Такеши Китано со„Насилство 2“. Данскиот актер Мадс Микелсен публиката ќе може да го види во два филма – историската драма „Кралска афера“ на Николај Арсел и „Лов“ на Томас Винтерберг.
За улогата во „Лов“ Микелсен ја доби наградата за најдобар актер на последниот фестивал во Кан. Во главната програма ќе биде и „Хајд парк на Хадсон“, филмот за Френклин Рузвелт со Бил Мари во главната улога. „Седум психопати“ на Мартин Мекдона е еден од најпровокативните наслови на фестивалот.
Буџетот на фестивалот изнесува 3 милиони денари, од кои половина од Министерството за култура, организаторите веќе најавија дека ова издание заради намалениот буџет ќе биде со скратена програма.