Самрак без зора

Светот и неговите последни револуционерни исероци во Нордот, решија да ги игнорираат моите напори да ги спасам.

Што е еден од најсериозните докази дека по Креда и Јура и некои други периоди, хомо сапиенсот цврсто решил да влезе во добата на Идиотот како последна временска станица на патот кон својата никогаш непрежалена пештера.

Штета.

Во тој хуманитарен проект бев вложив натчовечки напори на кои и Господ може да ми позавиди.

Во една есемес порака вели: Тричко ти си цар на спасението!

Џабе!

Сакав да им кажам дека популистичкиот болид со идиот во кокпитот, на првиот десен свиок ќе заврши во огрдата на Историјата.

Како Карлос Сајнц на пистата Интерлагос во Сао Паоло.

Под библискиот дожд.

Со тоа што катарпиларот за една минута го однесе црвениот болид на Ферари на анализа и сервис, додека болидот на светот и на Македонија, заедно со навивачите на глупоста, омразата, лефтерноста во занимавањето со сериозните работи на политиката, опремени со злоба, сеир и верба во чуда, месии и пророци, нема да има кој да го тргне и да го оправи незнајно колку време.

Американците барем направија свој Анти Вудсток на кој американските сељаци и остали провинцијалци, оглупавени од мрежите на Цукерберг и Маск, не водеа љубов во калта, туку гласаа за орален секс со микрофон како феноменална метафора за својата единствена желба: оние од градот да им го испушат. Глупаво, се разбира, затоа што Трамп и на нив им покажа што ќе мораат да прават за да ја мејкат Америка грејт. Агејн.

Така го глобализираа Милтон и тој во ликот на Доналд стана американски ураган од стота категорија.

Истата финта со микрофонот вмро им ја направи на Македонците и сега има да го пушат одавде до вечности.

Хахаха!

Нема потреба Америка да се изолира. Некогашнага надеж на светот не успеа да го уреди светот по своја мерка (Рорти) и ако по тој неуспех реши да оди во изолација никогаш нема да има подобар селотејп од него. Од Трамп.

Се што остана од Америка се мрежните могули од Калифорнија и Невада (Маск), носачите на авиони и црвенокосиот поскок.

Чисти отрови.

Америка беше земја на законот и на големите корпорации. Сега ќе направат од Америка една голема корпорација, а уставот и законите Маск ќе ги однесе на Марс, со тоа што по некое членче, згодно за интерпретации, ќе остават да лебди како некакво покритие за самоволието на оние на кои американскиот народ им ја предаде Америка во приватната сопственост со право да прават со неа што сакаат.

Немам амбиции и моќ за анализа, само нафрлам некои импресии.

Јазот меѓу најбогатите и останатите ќе се зголемува до нивото кое ќе ја доведе во прашање смислата на заедничкиот живот.

Како ќе се хармонизираат идентитетските прашања кои мелтингпот машинат не успеа да ги сомеле?

Темата за човековите права со која го урнаа комунизмот и есесесерот, веќе е прогласена за опасен левичарски екстремизам.

Што ќе има катастрофални последици врз високото образование кое трампистите заедно со културата и естрадата ги сметаат за главни извори на идеи за растурање на таканаречените традиционални вредности.

Јебале их традиционалне вредности.

Жените не успеаја да ги надгласаат простаците.

Циниците велат дека кај руралните Американци проработило чувството на солидарноста и тие го избрале Трамп само затоа што не можеле да поднесат еден таков лепотан од криминалец да оди сто години затвор.

Па го сместија на сугурно во Белата куќа.

Благородно од нивна страна.

Што ќе прави Европа?

Не знам, затоа што и без Тгамп е прилично раздрмана. Потпретседателот Ванс во една прилика беше рекол дека некои држави не ни заслужуваат да постојат. Што ме потсети на Вучиќевските предупредувања пред руската агресија против Украина, кога очигледно беше опремен со кремаљски информации. Трамп ќе се клацка меѓу растурањето на НАТО и зголемувањето на неговата цена за Европа, која или ќе се опреми за одбрана без фаталната зависност од Америка или ќе падне.

Несомнено ќе ги засили авторитарните и диктаторски тенденции и системи.

Украина “ќе ја реши за еден месец”, така што, претпоставувам, пола ќе му ја остави на Путин, Мицко ќе го натера да ја натера Бугарија да го крене ветото и да и плати на Македонија оштета (хахаха), Путин е несомнено задоволен што не би можело да се каже за неговиот кинески пријател Си. Техеран сигурно не е задоволен, Израел може да биде посигурен од Палестинците чија држава и новата администрација ја држи на долг стап.

Не верувам дека естрадноста на новата власт може да ја реши драмата на Блискиот исток.

Што ќе биде со светската трговија?

Големо и важно прашање затоа што Трамп планира светот да ја оправа Америка така што ќе го натера да плаќа преку царини и одбранбени аранжмани. Без да води сметка за тоа што ќе се случува со американските произоди и услуги.

Добар дел од светот се бореше против времето на идиотите, но јас имам впечаток дека полека ќе се аклиматизираме, односно сите ќе се идиотизираме. Тарантино може да направи римејк на филмот со вампирите така што во новата верзија кога ќе те допре или штипне за газот идиот, автоматски стануваш идиот. Додека некој Клуни не ти акне колец во градите. И во новиот филм самракот ќе трае до зората, само што во идиотизираниот свет зората може и да не дојде.