Социјалдемократскиот сојуз ќе ја предложи новинарката Санта Аргирова за уредник на информативната програма на јавниот сервис, дознава НОВА.
Рокот до кога согласно договорот од Пржино опозицијата треба да номинира уредник на МРТВ истекува утре, а за нивниот предлог треба да дадат согласност и останатите партии, ВМРО-ДПМНЕ, ДУИ и ДПА.
Ако партиите потврдат дека услови за избори има, новиот уредник на јавниот сервис ќе стапи на функција сто дена пред избори.
Санта Аргирова е долгогодишен новинар со искуство во јавниот сервис и телевизиите Телма и Алфа. Таа работеше и во кабинетот на министерката Илинка Митрева.
Аргирова е и автор на романите „Портрет од Дрезден“ и „Добро утро Јаков“.
Во последното излагање на тема јавниот сервис во антивладиниот камп кој со денови опстојуваше минатата година пред Владата, Аргирова посочи дека МРТВ мора да се врати на професионалните стандарди и да престане да биде сервис за сервилност на власта.
-Цензурата е забранета со Устав, слободата на изразувањето е гарантирана со Устав, МРТВ не смее да е роб на било која политичка структура што е на власт, не смее да биде ваков сервис каков што е сега, бидејќи радиодифузен сервис испаѓа дека е сервис за сервилност, бидејќи го нема она што е професионално она што треба да биде. Не може да дозволете еден лик шест пати во вестите затоа што сите ќе се посомневаат во вашата професионалност. Ако информацијата е моќ, тогаш МРТВ нема моќ, само некое бледило е останато, рече Аргирова на дебатата за јавниот сервис.
Назначување на предизборен уредник во јавниот сервис е дел од договорот меѓу четирите партии потписнички на Пржино, и е еден од предусловите за одржување на избори.
Според информациите на новинската агенција МЕТА, лидерската средба за одлучување дали има услови за избори ќе се одржи утре во 13 часот.
Освен изборот на уредник, се уште виси и комплетирањето на ад-хок телото за медиуми кое ќе врши проценка за балансираното изестување на медиумите пред избори.
Телото денеска треба да донесе одлука за петтиот член кој треба да е Албанец, а претходно СДСМ и ВМРО-ДПМНЕ предложија по двајца членови.
Лидерот на опозицијата Зоран Заев завчера изјави дека еден од двата клучни услови, ад хок телото за мониторирање на медиумите се уште не е исполнет не може да биде доволна пречка за лидерската четворка да не се договори за изборите на 11 декември. Сепак, Заев посочи дека е оптимист за договор.
„Повеќе сум оптимист во трагањето по мудроста како да се изнајде доволно аргументација да се избере петиот член. Ад хок телото како што знаеме сите, ги знаеме деталите и очекувањата од него, тоа не е крај на светот и не треба да дозволиме навистина поради една ваква мала причина да се одложат ставовите за заклучоците за исполнување на условите согласно кој ќе биде фиксиран датумот за избори. Јас верувам дека на 31 август ќе објавиме ние претседателите на поголемите партии дека 11-ти декември ќе биде датумот на изборите“, рече Заев.