Лидерот на СДСМ Венко Филипче денеска на прес-конференција говорејќи за економските индикатори, изјави дека состојбата со буџетот е алармантна и оти до крајот на 2025 година според статистичките бројки во буџетот ќе недостигаат 1,4 милијарди евра.
Се наоѓаме на само 75 дена пред крајот на 2025 година, а буџетската рамка, која е дефинирана од приходите и расходите во буџетот, покажува загрижувачка слика. Имено до денеска, приходите се реализирани со 70,78 отсто или 256,5 милијарди денари. Во исто време, расходите се на ниво од 72,82 отсто, односно речиси 294 милијарди денари. Ова значи дека со вакво темпо, а тоа е за очекување, на крајот на годината ќе недостигаат околу 1,4 милијарди евра за да се покријат сите трошоци. Тоа е фрапантна буџетска дупка. Ова значи дека сите овие пари ќе треба да се покриваат со задолжување, со нови оптоварувања за бизнисите и граѓаните или со кратења кај најважните јавни услуги. Ја прашувам власта, што планира да прави и како ќе ги покрива овие 1,4 милијарди евра?“, рече Филипче.
Според него, економската состојба во државата е алармантна, поради што, како што рече, чувствува должност и загриженост да ја објави вистината пред граѓаните наспроти пораките за економски „успеси“, кои власта ги зборува на митинг.
Во време кога премиерот Мицкоски од митинг на митинг зборува за економски „успеси“, должност ми е да зборувам за реалноста и да ги информирам граѓаните за реалната економска состојба. Во изминатите 15 месеци постојано алармиравме дека економијата и економските политики на оваа власт се многу погрешни, а реализацијата на проектите е историски најслаба. Денес тоа што го зборувавме го потврдуваме со реални економски индикатори, факти и бројки. Овие податоци укажуваат на алармантна состојба со буџетот, со приходите, со инвестициите и реализацијата на капиталните инвестиции, како основни индикатори за економската состојба во државата, рече Филипче на денешната прес конференција.
Тој кажа дека огромна загриженост предизвикува драматично ниската реализација на капитални инвестиции.
Би рекол историски најниска реализација. Заклучно со септември, реализирани се само 43,78 отсто од предвидените средства, или 20,7 милијарди денари. Тоа значи дека оваа ќе биде уште една изгубена година за капитални проекти. Проекциите покажуваат дека до крајот на годината ќе имаме некаде околу само 55 отсто реализација. Тоа значи дека пари што требало да отворат работни места, да донесат развој, ќе останат неискористени. Овие бројки покажуваат дека оваа Влада нема капацитет да ги реализира ниту сопствените планови и проекти, она што самите се обврзале да го направат, рече Филипче.
Лидерот на СДСМ посочи дека загрижувачките сигнали доаѓаат и од меѓународните институции.
Светската банка отворено укажува на слабата наплата на приходи, зголемените трошоци за камати и растечкиот јавен долг. Јасно повикува на фискална консолидација – односно со други зборови – престанете со непродуктивното трошење и заемите без покритие. Но Владата продолжува по истата траекторија. Ако навистина сакаме да ја разбереме состојбата, мораме да ја погледнеме сликата за јавниот долг. Во последниве 14 месеци, државата се задолжи за над 1,86 милијарди евра – една милијарда од Унгарија, 836 милиони преку аукции на домашни хартии од вредност. Во најава се нови 950 милиони евра надворешно задолжување и 70 милиони од домашни банки. Светската банка веќе проектира дека јавниот долг ќе достигне 62,9 отсто од БДП – што не прави најзадолжена земја на Западен Балкан. Ние сме исто така единствена земја во која актуелниот долг го надминува предпандемискиот пик. И покрај сето ова, Владата упорно повторува дека долгот е 61,7 отсто, изјави Филипче.
Тој додаде дека Фискалниот совет предупредува на приближно 700 милиони евра доспеани, а неплатени обврски и додаде дека тоа е скриен долг што директно ја уништува ликвидноста на македонските компании.
И додека долговите се трупаат, странските инвестиции – моторот на секоја здрава економија – исчезнуваат. Во 2024 година, Владата што ја предводеше СДСМ остави повеќе од една милијарда евра странски директни инвестиции. А што имаме во 2025? Во првиот квартал – 135,8 милиони евра. Во вториот – само 75,9 милиони евра. Премиерот, кој неодамна влезе во еуфорија со најави за милијарди, сега молчи. А токму тоа молчење е најгласниот доказ за економскиот пад, изјави Филипче.
Тој се осврна и на инфлацијата, при што рече дека реалната годишна инфлација е околу четири отсто.
И таа се чувствува секој ден, имаме најскап живот од сите држави во регионот. Затоа, денес, тука, пред вас, го поставувам наједноставното, но најважно прашање за оваа власт: каде е планот? Како Владата планира да ја покрие буџетската дупка од 1,4 милијарди евра до крајот на годината? Каде се капиталните проекти што беа најавувани? Каде е стратегијата за наплата на приходите, за стабилност, за инвестиции? Почитувани, Економијата не се води со лажни бројки и ПР. Се води со одговорност кон секој денар со сериозна стратегија, со стабилност и со план. Ништо од тоа не гледаме од оваа Влада. Ако не постои јасна стратегија, ако реалноста се прикрива со лажни индикатори, тоа јасно укажува дека на среден и долг рок оваа власт ќе го столчи и стандардот и економскиот развој, изјави Филипче.