Анкетата на ИРИ е стара и не го отсликува моменталното расположение на граѓаните, велат од СДСМ.
Објавените резултати од истражувањето на Меѓународниот Републикански Институт (ИРИ) не го прикажуваат реалното расположение на граѓаните сега, реагираат од владејачкиот Социјалдемократски сојуз, додавајќи дека анкетата е спроведена во ноември и декември, односно пред четири месеци.
„Вакви податоци од пред четири месеци може да се каже дека немаат соодветна релевантност денеска односно се надвор од актуелниот политички контекст. Во периодот од изминатите четири месеци, имаме сосема поинаква политичка реалност, нова Влада којашто е избрана во јануари, со нов премиер, зголемено парламентарно мнозинство и многу други фактори кои се променети по ова истражување, а силно влијаат на перцепциите. Оттука, цениме дека објавувањето на резултатите од анкетата создава погрешна перцепција кај граѓаните, како за рејтинзите на политичките партии така и во однос на другите теми и прашања од истражувањето. Ги охрабруваме сите домашни и меѓународни институции и организации навремено и целосно да ги објавуваат резултатите од своите истражувања, за да се избегнат какви било погрешни толкувања“, велат од СДСМ.