СДСМ бара еден од тројцата кандидати за лидер да се откажат, а изборот е помеѓу Зоран Заев, Зоран Јовановски и Игор Ивановски, кои со заеднички договор би го намалиле бројот на кандидати, односно еден од нив доброволно би истапил од трката за прв човек на најголемата опозициона партија.
Високи извори од СДСМ објаснуваат дека идејата на намалување на кандидатурите е спречување на трошење на енергијата и оттука предизвикување на поделби и раскол, наместо да се спојат концептите и визијата не само за партијата туку и во име на интересите на државата.
Со ваквиот потег, само би го зајакнале единството во партијата, велат нашите извори, затоа што ионака селекцијата ќе биде направена на јунскиот Конгрес, што може евентуално да направи поделби, кои најмалку и се потребни на земјава во овој момент. До понеделник ќе течат прегвоорите помеѓу Заев, Ивановски и Јовановски, после што ќе биде познат епилогот од оваа идеја да се намали бројот на кандидатури по моделот на западните, зрели демократии.
Денеска и официјално со соопштение излезе Кире Наумов, еден од кандидатите за претседател на СДСМ, кој извести дека генералниот секретар на оваа партија Андреј Петров, побарал одложување на лидерската кампања од понеделник, 20.05.2013 година, за “да се остави време на останатите тројца кандидати евентуално да се договорат за намалување на бројот на кандидатури”, после што Кире Наумов најавува неформална средба со останатите кандидати, за какo што изјави тој за НОВА, да си подадат рака за фер и демократска трка за лидер на најголемата опозициона партија.