Демаскирана е уште една голема лага на Христијан Мицкоски. Се покажа дека со измами, со манипулации не може да се дојде до парламентарно мнозинство. Соочен со пораз на неговите невистини, Мицкоски треба да излезе пред граѓаните, да се извини и да поднесе оставка, порача портпаролката на СДСМ, Богданка Кузеска.
Таа рече дека со денови Христијан Мицкоски го лажел народот дека има ново мнозинство, односно дека има 61 глас за недоверба на Владата.
-За пуста власт по секоја цена, седна на маса со оние коишто се против НАТО, против ЕУ, против Преспа, против добрососедските односи, против Рамковниот договор. Без било какви приниципи посакуваше дестабилизација, криза, враќање назад, рушење на постигнатото во однос на стратешките интереси на земјата. Наместо да се засрами, да се извини, да понесе одговорност, Мицкоски и ВМРО-ДПМНЕ продолжуваат со невистини за наводно киднапирање на пратеник. Во време кога истиот тој пратеник јавно објави дека бил под закани токму од опозицијата, рече Кузеска.
Таа додаде дека од овие причини Мицкоски треба да поднесе оставка.
-Срам е да не се извиниш за сите лаги и да не поднесеш оставка, заклучи Кузеска.