Во СДСМ е се уште неизвесно кој кандидат за лидер ќе отпадне, по одлуката да дојде до селекција, со цел да останат само три кандидати, дознава НОВА од високи извори во партијата. Селекцијата е помеѓу Игор Ивановски, Зоран Јовановски и Зоран Заев.
Иако одлуката требаше да биде донесена до денес, рокот се пролонгира до утре или најдоцна до четрврток, кога се одржува Извршен одбор на оваа партија и кога конечно ќе се знае исходот од преговорите помеѓу тројцата кандидати. Кире Наумов е четвртиот кандидат за лидер, но тој не е дел од овие преговори.
Како што веќе објави НОВА, со заеднички договор на тројката Ивановски, Јовановски и Заев, би се намалил бројот на кандидати, односно еден од нив доброволно би истапил од трката за прв човек на најголемата опозициона партија.
Високи извори од СДСМ објаснуваа дека идејата на намалување на кандидатурите е спречување на трошење на енергијата и оттука предизвикување на поделби и раскол, наместо да се спојат концептите и визијата не само за партијата туку и во име на интересите на државата. Конечно, ваквиот потег се образложува и со искуството на постарите, зрели демократии, каде во изборната трка влегуваат најмногу тројца кандидати.
Со ваквиот потег, само би го зајакнале единството во партијата, велат нашите извори, затоа што ионака селекцијата ќе биде направена на јунскиот Конгрес, што може евентуално да направи поделби, кои најмалку и се потребни на земјава во овој момент.