Министерството за здравство набавило вакцини за деца од редовниот календар за имунизација кои имале рок на траење за една година пократок од тој што бил наведен во фактурите од страна на добавувачот, се вели во најновиот Извештај на Државниот завод за ревизија, кој се однесува на 2017 година. Иако ова е влезено во записникот за прием на МЗ и Агенцијата за лекови, Внатрешната контрола на Министерството за здравство не ја забележала утврдената состојба и не биле преземни мерки за да се спречи дистрибуцијата на овие вакцини.
Набавката на вакцините во вредност од 15.280 000 денари одела преку Министерството за здравство и Агенцијата за лекови при што во записникот за прием е наведен рок на траење кој е за една година пократок во однос на наведениот рок на траење на вакцините наведен во фактурата од добавувачот, но никој во Министерството за здравство не реагирал на тоа. Се ова се случува во време на осетлива ситуација кога родителите одбиваат да ги вакцинираат своите деца поради страв од вакцините, се вели во Извештајот.
Ревизорите нагласуваат дека со ова се губи довербата кај граѓаните и допринесува за намалување на процентот на имунизација кај децата.
„Утврдената состојба не е забележана од страна на внатрешната контрола на Министерството за здравство и во услови кога довербата во сигурноста на вакцините кои ги набавува МЗ во јавноста е намалена, ваквите состојби придонесуваат за негативни реакции во јавноста и дополнително намалување на нискиот процент на имунизација кај населението“, се вели во Извештајот на ДЗР.
Нема објаснување дали ова се случувало и претходно. Во јануари годинава родители реагираа дека во пунктовите на децата им се даваат вакцини против морбили кои се пред истек на рокот на траење. Иако министерот Филипче се правдаше дека се работи за техничка грешка, односно за погрешни декларации на 60-тина пакувања, инспекциската контрола во вакциналните пунктови откри повеќе од 600 пакувања од вакцини на кои имало декларации со поминат рок на траење.