Денеска ќе биде отворена новата зграда на Основниот суд, осум години откако беше поставен камен – темелник во 2010 година.
Новата зграда на Кривичниот суд е лоцирана кај новата катна гаража и комплексот судови. Првично беше планирано да чини 8,3 милиони евра, пари обезбедени од Светската банка и државниот буџет, но цената се зголеми за дополнителни 2,7 милиони евра,со склучување на анекс договори.
Судот е проектиран на 10 нивоа, две подрумски, приземје, шест ката и поткровје. Предвидени се 74 судски кабинети, 22 средни судници и две репрезентативни од кои една за 200 лица за случаите на организиран криминал и една за 100 лица. Објектот има вкупна корисна површина од 8.826 метри квадратни.
Веќе в понеделник во големата судница треба да се одржи првото рочиште за „Титаник“, во кој обвинетите се товарат за злосторничко здружување, злоупотреба на средствата за финансирање на изборната кампања и повреда на избирачкото право.
Инаку, „Титаник“ е првиот случај за кој СЈО поведе истрага во февруари 2016 година, а воедно е и најобемниот предмет, во кој покрај Груевски првообвинети се и екс министрите за транспорт и врски и за внатрешни работи, Миле Јанакиески и Гордана Јанкулоска, пратеникот Илија Димовски, поранешниот шеф на кабинет на Груевски, Мартин Протуѓер и екс генералниот секретар на Владата, Кирил Божиновски.
Во овој предмет обвинети се и разузнавачот Мунир Пепиќ, градоначалникот на општина Пустец во Албанија, Едмонд Темелко, Леко Ристовски, Кирил Тодорвски, Катерина Веловска, Станко Коруновски, Коста Марковски, Драгче Драгчески, Марјан Накевски, Гоце Јаневски, Џезми Ахмет, Роберт Давитков, Далибор Алешковиќ и Ленка Рашајковска. Обвинета е и поранешната заменичка на министерот за правда, Билјана Бришкоска Бошковски.