Синот на Сириецот кој почина од срцев удар, не дозволува телото на неговиот татко да биде погребано во Македонија. Информацијата за НОВА ја потврдија во УНХЦР. Тој е веќе во државата, откако по дводневно чекање влезе во Македонија, преку Грција. Со себе имал само времен документ за престој во Германија, поради што не го пуштаа на граница.
„Тој одлучил телото на неговиот татко да го однесе далеку од тука, да го погребе во Сирија или Либија, а вели дека целиот трошок ќе го понесе самиот“, велат во УНХЦР.
Со себе ќе го земе и малолетниот брат кој беше сместен во згрижувачко семејство, откако почина татко му.
Не се знае колку бегалци има во меѓузоната на границата меѓу Грција и Македонија, но нивниот број постојано се зголемува. Додека чекаат да ја поминат границата остануваат со денови на сонце и дожд, таму ноќеваат.
Од Црвениот крст велат дека оваа ситуација ќе потрае и тие со уште неколку хуманитарни организации се обидуваат да го зајакнат системот за помош. Веќе се реорганизираат во две смени и имаат мал пункт во Гевгелија. Во четири мобилни екипи, 120 волонтери и 20 професионалци се распоредени на границите со Србија и со Грција.
Според Сузана Тунева која го координира делот со бегалците, првото сценарио е да им се овозможат хигиенски услови додека се таму, во меѓузоната, за да не се развијат заразни болести. Ќе се поставуваат подвижни тоалети, контејнери, дистрибуира хуманитарна помош. За таа цел веќе добиле 200.000 франци од Меѓународниот црвен крст.
„Тешко е да се утврди колку бегалци има таму. Ќе одиме двапати во неделата во меѓузоната да истражиме колку луѓе има и што треба да однесеме..Двапати однесовме хуманитарна помош за 800 луѓе, храна, кебиња, хигиенски средства. Полека се прави систем бидејќи ова ќе потрае. Се координираме и со другите хуманитарни организации , во кои делови од денот да се вклучат тие, во кои ние“, изјави за НОВА, Сузана Тунева од Црвениот крст.
На бегалците веќе им се дистрибуираат флаери на арапски и англиски јазик
во кои има упатства каде да се обратат, каде има мобилни тимови за помош, како да се движат низ државата и слично. Ќе се делат флаери и на француски и арапски, а во наредните денови и на три од нивните локални јазици, велат во Црвениот крст.
Бегалците добиваат бесплатно лекување, а епидемиолошкиот надзор функционира во Гевгелија. Токму во овој град има и најмногу медицински интервенции кај бегалците кои доаѓаат уморни, со повреди на нозете, со кожни инфекции.
Веќе е најавено дека општининските власти во Гевгелија заедно со претставници од УНХЦР и на Меѓународниот Црвен крст ќе градат специјален пункт во градот за мигрантите кои пристигнуваат преку границата меѓу Македонија и Грција.
Во моментот ниту една од државите не го покренува прашањето во меѓузоната на границата со Грција и Србија, да се подигнат шатори за да им се олесни на луѓето, да има каде да се одморат и заштитат од сонцето и дождот. Не се подготвува терен и во случај ситуацијата да ескалира, доколку Унгарија ги затвори границите
„Веќе не станува збор за хуманитарна криза, ова е феномен“, вели Тунева.
Се проценува дека дневно по 3000 мигранти поминуваат низ Македонија. Откако беа донесени измените на Законот за азил за две недели биле поднесени повеќе од 6000 барања за азил, велат во МВР.
Ниту еден од мигрантите досега не побарал да остане во Македонија.
Единствено семејство кое најдолго останало, бидејќи жената се породила тука, си заминале од државата кога бебето направило седум месеци.
Тие биле Сиријци, христијани, а биле сместени во Штип.