Осумкатница висока 29 метри ќе никне на местото на сегашното седиште на главниот штаб на ВМРО – ДПМНЕ.
Во трговскиот центар 20 проценти се предвидени за продавници и мали деловни простории. Потоа за големите трговски единици се отстапени 30 проценти од просторот. За хотелот 15 проценти. Државни институции 10 проценти, а за фитнес клубови цели 40 проценти колку што е испланирано и за културна дејност. Сето ова е наведено во јавниот повик кој што ВМРО-ДПМНЕ денеска го испрати до медиумите, а бил објавен во четири дневни весници во периодот од 10.07 до 11.07 2012 година.
Не се знае кој е инвеститорот што ќе гради на просторот на земјиштето кое е во сопственост на ВМРО – ДПМНЕ. Се знае само дека приватниот инвеститор ќе мора да отстапи 30 проценти од просторот за потребите на партијата, а останатиот простор ќе го користи за свои комерцијални потреби.
Во соопштението од Центарот за комуникации велат дека се е во согласност со деталниот урбанистички план „Мал ринг“. Нема објаснување кои се фирмите кои конкурирале на јавниот повик, ниту пак кој е инвеститорот што ќе гради осумкатница во центарот на градот на местото на седиштето на партијата.
Вниманието на јавноста денеска беше свртено кон објектот на ВМРО-ДПМНЕ од каде што се вадеа прозорците, а од таму веќе е изнесен и инветарот. Вчера доцна попладне беа исечени и околните дрвја. Портпаролот на градоначалникот Коце Трајовски, Неделчо Крстевски, за НОВА изјави дека јавното претпријатие Паркови и зеленило има уредно решение за сечење на дрвјата издадено од општина Центар, во кое стои дека на овој простор ќе се гради нов објект.
Не се знае ниту во кој стил ќе биде изграден новиот трговски комплекс каде ќе биде сместено и седиштето на партијата. Во февруари лани, „Утрински весник“ објави дека не е исклучена можноста покривот на новата зграда на партијата да го красат скулптури.
Повикувајќи се тогаш на последната верзија на урбанистичкиот план весникот објави дека на партијата и’ било дозволено налик на идеите за покривите на зградите на плоштадот да постави содржини за украсување на врвот од зградата.
Експерте кои ги консултираше НОВА велат дека се брза да се започне со градежните работи на оваа парцела, пред официјално да започне со работа новата локалната власт во општина Центар која е надлежна за деталниот Урбанистички план. Дали се точни нивните констатации ќе се види наскоро.
Инаку, за утре е закажана конститутутивна седница на новиот совет на општина Центар со која извесно е дека ќе претседава Андреј Жерновски.