Претставникот на Алијансата на Албанците, Зијадин Села, по средбата со еврокомесарот Јоханес Хан и тројцата пратеници Кукан, Вајгл и Флекенштајн изјави дека нема ништо ново и државата е се уште во политичка криза, јавува репортерот на НОВА, Влатко Чаловски од Собранието.
Според него, насоката која Хан им ја дава на лидерите е избор на претседател на Собрание, давање на мандатот на мнозинството од 67 пратеници и формирање на Влада која ќе работи на реформи.
За Иванов, Села вели, тој нема право на лично мислење туку како претседател треба да го спроведува Уставот.
Села потенцираше дека не смее да има владеење на правото со двојни стандарди и доколку Иванов го крши Уставот тој треба да одговара. Според претставникот на АА, во моментов „хаосот” во државата е создаден од истите кои сакаат да го контролираат и притоа да избегнат одговорност за своите постапки. Хан во моментов е на средба со лидерот на ДУИ, Али Ахмети а претходно се сретна со Билал Касами од БЕСА.