По вчерашниот политички протест на кој се бараше слобода и повторно судење за осудените лица кои упаднаа во законодавниот дом на 27 април 2017, со свој став се огласи и лидерот на Алијансата за Албанците, Зијадин Села. Според него Судот со пресудата си го кажал својот збор, а како што додаде според него има уште многу други што треба да завршат во затвор но се уште се шетаат на слобода.
– Единствениот кој невин лежи во затвор е човекот кој ме спаси мене на 27-ми април, Абдулфета Алими. Тие што се надвор се тие што отвораа врати и тој што беше министер за внатрешни работи. Поткрепа за ова што го велам, е фактот дека немаше никаква резистенција од страна на униформираната полиција за да ја спречат топлата да влезе во Собранието, вели Села во изјава за Дојче Веле.
Во изјавата тој се осврна и на оние кои се ставија во одбрана на тој настан и на учесниците во него.
„Чудно е што досега некои се обидуваа да се оградат од тие настани, сакајќи да покажат дека се реформирани. Вчерашниот протест е скандал. Вчерашниот протест уште еднаш гласно покажува дека некој во Македонија сака да воспостави двојни аршини, а тоа не е добро за државата“, вели Зијадин Села.
Прашан за поддршката што Груевски ја даде за вчерашниот протест, Села со краток одговор: „Тој е во групата на најголемите кукавици!“