Русија истрела повеќе од 100 ракети врз градови низ Украина во серија напади што следеа по понижувачкото повлекување од Херсон, иако има знаци дека нејзините сили се повлекуваат појужно од реката Дњепар, соопшти украинската војска.
Се огласија сирените за воздушен напад и одекнаа експлозии во десетина големи градови по еден од најголемите руски ракетни напади досега, следејќи го примерот во последните недели кога Москва напаѓаше далеку од фронтот по загубите на бојното поле.
Во главниот град Кијив огнот зафати петкатна станбена зграда, една од двете станбени згради за кои властите соопштија дека биле погодени таму. Градоначалникот на Кијив, Виталиј Кличко изјави дека е потврдено оти во нападите загинало едно лице, а половина од главниот град останал без струја.
Други напади или експлозии се пријавени во големите градови, од Лавов и Житомир на запад до Кривој Рих на југ и Харкив на исток. Регионалните власти известија дека некои од нападите го прекинале снабдувањето со електрична енергија.
Големите напади се случија четири дена откако руските сили го напуштија јужниот град Херсон, единствената регионална престолнина што Москва ја зазеде од почетокот на агресијата, шест недели откако претседателот Владимир Путин ја прогласи за вечен дел на Русија.
Русија минатата недела соопшти дека нејзините сили ќе заземат позиции кои полесно се бранат на спротивниот брег на реката Дњепар. Но, видео снимките направени во градот Олешки, преку урнатиот мост од Херсон, се чини дека покажуваат дека и руските сили ги напуштиле своите бункери.
Понатаму кон исток, градската управа поставена од Русија соопшти дека ги повлекува државните службеници од вториот по големина град во регионот, Нова Каховка, кој се наоѓа на брегот на реката до огромна стратешка брана.
Наталија Хуменјук, портпаролка на украинската војска, рече дека се чини оти Москва ја преместува својата артилерија на 15-20 километри подалеку од реката, за да ги заштити своите топови од украинските контранапади.
На левиот брег на реката Дњепар постои одредена активност на непријателските сили во однос на оддалечувањето од брегот на 15-20 километри. Русија има артилерија што сè уште може да го погоди Херсон од тие нови позиции, но имаме и со што да одговориме, истакна таа.
Украинскиот претседател Володимир Зеленски ги коментираше новите бомбардирања, оценувајќи дека можеби сè уште не е готово.
Знам дека ракетните напади доведоа до недостиг на електрична енергија низ целата земја. Работиме на тоа, сè ќе поправиме, ќе преживееме, нагласи шефот на државата.
САД остро ги осудија руските ракетни напади врз Украина.
Не заборавивме дека додека светските лидери се состануваат на Г-20 на Бали и разговараат за прашања од големо значење за животот на луѓето ширум светот, Русија повторно ги загрозува тие животи и ја уништува инфраструктурата на Украина. Овие руски напади само ќе ја продлабочат загриженоста меѓу Г-20 за дестабилизирачкото влијание на војната на Путин. Нашите мисли се со храбриот украински народ, кој продолжува да покажува издржливост и храброст во одбраната на сопствениот суверенитет и демократија, изјави американскиот советник за национална безбедност Џејк Саливан.