Шарената револуција најави голем протест за денеска кој ќе започне во 19 часот пред Специјалното јавно обвинитлество, по истекувањето на ултиматумот даден до 18-ти месецов кога Уставниот суд треба да се произнесе за легитимноста на СЈО.
– На оваа корумпирана и криминална власт и дадовме и повеќе од доволно време да реагира и да ги слушне нашите барања. Тие се глуви пред своите граѓани. Единственото нешто на што тие мислат е како побрзо да избегаат од правдата. Специјалното јавно обвинителство е првата светлост во оваа правна темнина во која живееме, а власта го кочеше уште пред да биде формирано. После одлуката на Уставниот суд да не го стави СЈО на дневен ред ниту за следната своја седница, очигледно е дека Груевски и неговите соработници се обидуваат да го укинат СЈО кога најмалку ќе очекуваме, се вели во образложението на “Шарените“.
Според нив, тврдина на правдата, која граѓаните силно ја поддржуваат изминативе два месеца, сега е под сериозна закана.
– Груевски се плаши од затворот што го чека! Како граѓани имаме обврска да го спасиме СЈО од прангите на криминалците на власт! Иако прогонот врз демонстрантите продолжува, граѓаните ќе ја земат правдата во свои раце. Институциите што треба да не’ бранат нас граѓаните всушност ги бранат само криминалите на владеачката партија, смета Шарената револуција.
Демонстрантите кои се дел од протестите велат на Груевски му е дојден крајот, само треба уште малку да биде притиснат.
– Да бидеме сплотени и здружени како никогаш порано! Да му ставиме крај на ова црно зло што ни ја уништува државата! Граѓаните доаѓаат правдата и демократијата да ја земат во своите раце! Смрт за фашизмот, слобода на народот! Нема правда, нема мир!, се вели во пораката од Шарена револуција.
Демонстрантите поставија ултиматум до 18. јуни, Уставниот суд да ја стави на дневен ред, односно да одлучи да ја разгледа Иницијативата за уставноста на Специјалното обвинителство, актуелната влада на ВМРО-ДПМНЕ и ДУИ да поднесе оставка и да се формира преодна Влада која ќе ги примени реформските приоритети од извештајот на Прибе и ќе организира фер и демократски избори.
Дел од барањата се и формирање на специјално одделение во Кривичниот суд, надлежно за случаите под јурисдикција на СЈО, задолжително вклучување и присуство на независни претставници на граѓанското општество во процесот на решавање на кризата, процесот на решавање на кризата да се одвива на територија на Република Македонија и оставка од претседателот Иванов.