Уставниот суд на Република Македонија на својата официјална интернет страница, штотуку го објави дневниот ред за следната седница закажана за в среда, но меѓу точките на дневен ред не е и разгледување на Иницијативата за Законот за Специјалното обвинителство.
Во меѓувреме, Шарената револуција одбројува уште два дена до поставениот ултиматум до Уставниот суд за да се произнесе за СЈО. Оттаму велат дека, доколку Судот не се произнесе до 18. јуни, тогаш демонстрантите ќе ја преземат власта во свои раце, но засега тие не го образложуваат планот како ќе дејствуваат понатаму.
За денеска напладне „шарените“ анјавија блокади за сообраќајот на три места во Скопје и тоа мостот „Гоце Делчев“, мостот „Слобода“ и мостот „Мајка Тереза“.
-Уставен суд се уште не постапува по нашето барање за заштита на правдата. Прашуваме, планира ли овој суд, оформен во име на граѓаните и платен со пари на граѓаните да се произнесе за Специјалното јавно обвинителство? Или планира да го укине?
Додека обројуваме за одговор на ова прашање, прогонот врз демонстрантите се уште трае. Наместо повлекување на пријавите, добиваме информации за нови прекршочни и кривични.
Граѓани и граѓанки, СЈО се уште е под закана! Демонстрантите се уште се под закана! Затоа, ајде уште еднаш заедно да им ја покажеме нашата бескомпромисност!, се вели во повикот на Шарената револуција.