Шведската војска ги интензивира пребарувањата во океанските води надвор од Стокхолм, за подводната мистерија за која се шпекулира дека се работи за подморница.
На цивилните бродови им беше наредено да се држат најмалку 10 километри оддалечени од шведскиот воен брод кој ја спроведува истрагата.
Потрагата започна во четвртокот откако веста за појавувањето на подморницата првпат се пронесе во изданието на шведскиот весник Svenska Dagbladet.
Изданието повикувајќи се на неименувани извори, соопшти за „пресретнување на разговори на руски јазик на СОС фреквенцијата“ во водите на кралството.Сигналот одел од Стокхолмскиот архипелаг за Калининград, каде се наоѓа штабот на Балтичката флота.
Холандската армија посочи дека мистериозната подморница, која е предмет на истрага на шведските поморски сили во Балтичкото Море, не е нејзина, како што тврдеше руското Министерство за одбрана.
Во неделата контра-адмиралот на морнарицата на Шведска Андерс Гренстад изјави дека вооружените сили на земјата трипати регистрирале „подводна активност“ во секторот на Стокхолмскиот архипелаг, меѓутоа не можат да ја потврдат информацијата дека тоа била руска подморница.
Од Министерството за одбрана на Русија изјавија дека „никакви непланирани и, уште повеќе, вонредни ситуации со руските воени бродови немало и нема“.
И американските претставници соопштија дека нема нивни пловни објекти во областа која ја пребарува Шведска.
Според Јохан Викторин, шведски воен експерт, постојат три можности за забележувањето на објектот.
Тој вели првата можност е Русија ги мапира водите со цел полесно да се справи во случај на непријателски напади. А исто така посочува дека можеби инсталираат сензори за следење на други пловни објекти или едноставно Русите се впуштени во разузнавачка мисија.