Ковачевски на средби со високи функционери од ЕУ и САД.
Пријателството меѓу Обединетото Кралство и Северна Македонија, како и сојузништвото во НАТО се силни влогови за безбедноста и стабилноста, напиша премиерот Димитар Ковачевски по средбата со британскиот премиер Борис Џонсон на маргините на Минхенската безбедносна конференција.
Обединетото Кралство, како што посочува премиерот Ковачевски, е наш стратешки партнер, и во континуитет ни дава силна меѓународна поддршка.
„Премиерот Џонсон ни честиташе за сите наши заложби за спроведување конструктивен дијалог кој ќе ни овозможи исполнување на нашите стратешки цели за евроатланска интеграција“, напиша премиерот Ковачевски на Фејсбук.
Ковачевски се сретна и со претставничката на Мичиген во конгресот на САД, Елиса Слоткин, која минатата година се приклучи на конгресната група за пријателство со Северна Македонија.
„На нашата средба на Минхенската безбедносна конференција изразив благодарност за нејзината исклучителна активност и заложба за нашето членство во НАТО. Конгресменката Слоткин останува да биде една од водечките гласови за национална безбедност во САД со богато искуство за Европа, нашиот регион и пошироко“, напиша Ковачевски.
Во рамки на Минхенската конференција, со државната министерка за европски прашања и меѓународни односи на Баварија, Мелани Хумл било разговарано за одличната соработка која Северна Македонија ја има Баварија заедничката, меѓувладина комисија.
„Се согласивме дека во фокусот на нашето внимание треба да биде зајакнување на економската соработка со поврзување на стопанските комори и за соработка во други области. Баварија е подготвена да помогне во реформите на правосудството и борбата против корупцијата, како и да ни понуди неопходна помош на нашиот пат кон ЕУ“, напиша Ковачевски на социјалните мрежи.