Синдикатот на Македонската опера и балет упати апел до министерката за култура да се ангажира во создавање основни услови за работа на уметниците во оваа институција, како реакција на нејзината изјава во однос на реновирањето на гледалиштето во МОБ.
– Под услови подразбираме: уредни гардероби и тоалети кои последниве години наликуваат на се освен на тоа за што се наменети, обезбедување потрошен материјал за инструменти кој го немаме земено повеќе од година и половина, костуми и фустани за јавни настапи (работни униформи), столови за оркестар и хор за јавни настапи и пултoви за ноти кои ќе обезбедат минумум светлина потребна за професионално извршување на нашите работни обврски, се вели во соопштениетот од Синдикатот.
Тие истакнуваат дека на ова предупредувале повеќе години наназад и дека министерката Канческа Милевска повеќепати ја посетила институцијата и ги видела условите во кои тие работат.
– Удобноста на гледачите и слушателите нема да ја зголеми продуктивноста на музичарите кои седат на неудобни столови и го губат видот читајќи ги нотите на полуосветлен пулт. Уметноста се создава од задоволство и испирација, желба да се твори, а не под јаремот на нужноста, заради само докажување на раководството дека успева од ништо да направи нешто, во никакви услови, врз грбот на оние кои чесно си го заработуваат лебот, велат од Синдикатот на МОБ.
Тие укажуваат и дека климата во институцијата не е на завидно ниво и уметниците се на работ од трпението, „бесцелно прашувајќи се дали зголемениот обем на работа кој паѓа врз грбот на уметникот ќе придонесе за решавање на проблемите на уметниците или со нивниот двојно зголемен труд ќе треба само да се затворат финансиски дупки направени од раководството“.