Советот на Синдикатот на Клинички центар по состанокот доцна попладне одлучил да чека на ветувањето на министерот Филипче дека ќе се направат напори да има покачување на платите од 10 проценти за сите здравствени работници со јануарската плата. Ова за НОВА го потврди претседателот на синдикатот Горан Беговиќ.
Синдикатот утринава имал преговори со министерот Филипче на кого му ги искажале барањата и нивниот став дека зголемување на платите треба да има за сите здравствени работници, освен за администрацијата која е во посебна програма.
„Министерот Филипче рече дека има расположение за ова, го поддржа нашето барање и најави дека до среда идната недела ќе имаме одговор на барањето. Тој најави дека во понеделник ќе има разговори во Министерството за финансии, а во вторник за ова треба да се одлучува на владина седница. Во среда министерот треба да не извести што е одлучено“, изјави за НОВА, Беговиќ.
Кај медицинските сестри, лаборантите, физиотерапевтите и другите здравствени работници постои огромно незадоволство откако беше најавено дека покачување од 10 проценти ќе има само за лекарите специјалисти. Тие имаат поддршка и од лекарите низ цела држава со образложение дека работат тимски и дека покачувањето треба да важи за сите.