Сириски бегалец починал денеска во Гевегелија, оставајќи го својот 16 годишен син сам, дознава НОВА. На 42 годишниот Сириец му се слошило, но и покрај пружената медицинска помош лекарите не можеле ништо да направат.
Телото е предадено на обдукција во Институтот за судска медицина. Момчето е згрижено во семејство, до утре кога се очекува да стигне неговиот чичко од Германија. Тоа било во состојбата на шок и не зборувало ништо. Стотици мигранти чекаат за влез во државата во меѓузоната со Грција, на топлото време.
Пред два дена бегалка од Сирија се породи во болницата во Гевгелија и доби здраво женско бебе. Извори за НОВА велат дека болките ги добила на грчка страна, но полицајците не реагирале. Интервенирале македонските полицајци кои ја извлекле жената од таму и ја однеле во болница.
Зголемени полициски контроли ги спречуваат мигрантите да влезат од Грција во Македонија и тие чекаат момент за да влезат во државата. За овие десет дена биле издадени барања за азил на околу 5000 мигранти и по истекување на рокот од 72 часа ниту еден од нив не останал во Македонија.
Стотици мигранти со денови чекаат и на границата со Србија во меѓузоната, за да влезат во државата. Тие чекаат на отворено на сонце и дожд, таму спијат, а помош добиваат од невладината организација „Легис“, Здружението „НУН“ , како и Црвениот крст на Македонија.