Граѓаните прашуваа колку време треба да помине од една до друга вакцина, односно по примањето вакцина против ковид-19 кога да се заштитат и против грип. Според најновите препораки, не мора да помине многу време – ако некој се вакцинирал против ковид-19, веќе следниот ден може да прими и вакцина против сезонски грип, само во друга рака треба да ја примат вакцината – вели д-р Соња Ралева, специјалист по општа медицина во поликлиниката Бит Пазар.
Голем интерес кај скопјани за вакцинација против сезонски грип која, освен во Скопје, утринава почна и во повеќе градови низ земјата – Штип, Кочани, а вратите ги отворија и пунктовите во Виница, Берово, Делчево. Охриѓани, според најавите, ќе почнат да се имунизираат против грип од понеделник.
Во Центарот за јавно здравје – Скопје до 10 часот против грип веќе се заштитиле 52 граѓани, а во поликлиниката Бит Пазар на вакцинација се јавиле сите закажани во системот „Мој термин“.
– Во најдобар ред се одвива вакцинацијата против грип на првиот ден, според термините закажани на „Мој термин“ и еве, денеска до 10 часот се вакцинираа 52 скопјани. Се уште не се пуштени во употреба комерцијалните вакцини, со нив ќе почнеме да вакцинираме од понеделник. Секако дека обезбедивме и посебни простории за аплицирање на вакцината протов грип, за да се одвива одделно од имунизација против ковид-19, вели д-р Љуљзиме Бајрами, раководителка на одделот за епидемиологија во ЦЈЗ.
За тоа дали истовремено може да се примат и вакцина против ковид-19 и против грип, д-р Бајрами вели:
– Се раководиме според препораките на Комитетот за имунизација и го почитуваме нивниот став кој вели – може и истиот ден да се примат овие две вакцини, но во различни места, односно на различна рака. Не мора да има растојание, или може против грип вакцината да се прими по два или три дена по таа за ковид-19. Во почетокот препораката беше да се чека 14 дена, додава раководителката на одделот во ЦЈЗ.
Оние граѓани коишто нема да се јават за вакцина во определниот термин, ќе може да ја примат вакцината во наредните седум дена.
И во поликлиниката Бит Пазар од изутрина голема заинтересираност за вакцина против грип.
– Одѕивот за вакцинација е одличен, се јавија сите до еден коишто закажале на „Мој термин„ а денеска тоа се лицата над 65 години и хронично болните. Граѓаните прашуваа колку време треба да помине од една до друга вакцина, односно по примањето вакцина против ковид-19 кога да се заштитат и против грип. Според најновите препораки, не мора да помине многу време – ако некој се вакцинирал против ковид-19, веќе следниот ден може да прими и вакцина против сезонски грип, само во друга рака треба да ја примат вакцината – вели д-р Соња Ралева, специјалист по општа медицина во поликлиниката Бит Пазар.
Д-р Ралева: Има доволно време за стекнување имунитет
Во врска со тоа има ли доволно време за стекнување имунитет кај вакцинираните, со оглед дека веќе има пријавено 70-ина заразени со грип во Скопје, д-р Ралева појаснува:
– Има време лицата коишто примаат вакцина да стекнат имунитет против инфекцијата, за што требаат околу две недели. Освен за ова, граѓаните се интересираат, бидејќи пијат лекови и за други хронични заболувања, дали можеби вакцината ќе влијае на тоа, како и за можните несакани ефекти од вакцината. Имунизацијата денеска поминува во најдобар ред, вели д-р Ралева.
Годинава имунизацијата против грип се врши со вакцината influvac tetra, која е од француски производител и е четиривалентна, како што беше и претходните неколку години.
За Скопје оваа година се набавени 4.000 дози комерцијални вакцини, а цената најверојатно ќе изнесува слично како и во минатата година – 800 денари.
Од можни реакции по примањето на вакцината се наведуваат црвенило и слаба болка на местото на убодот, течење на носот, а во поретки случаи и лесно зголемена телесна температура.
Филипче: Очекуваме за десетина дена да заврши имунизацијата против сезонски грип
И министерот за здравство, Венко Филипче, денеска изјави дека во исто време може да се примат вакцините против ковид-19 и сезонски грип.
– Без разлика дали е прва, втора или трета доза на вакцина против ковид-19 може да се прими во исто време со другата вакцина, а ако има временска разлика, нема никаква врска колкава е временската дистанца, рече Филипче.
Во Скопје, освен во Центарот за јавно здравје и во поликлиниката во Бит Пазар, , вакцинација за сезонски грип се врши и во поликлиниките во Ѓорче Петров и во Идадија.
(Љ.Б.)