Извори од скопското муфтивство за НоваТВ потврдија дека муфтијата Ќенан Исмаили се вратил во земјава од службеното патување, па се очекува наскоро да се произнесат за случајот со џамијата во Злокуќани. Дали тоа ќе го направеле по пат на соопштение или на прес конференција, каде новинарите можат да поставуваат и прашања, засега се уште не било утврдено.
Секретарот на скопското муфтиство, Неџми Ферати, потврди дека имотниот лист за местото каде се гради џамијата е во сопственост на ИВЗ но не знаеше да каже дали џамиското претседателство извадило дозвола за градба или се впуштило во „авантура“ да гради без дозвола.
– Ние на верниците им даваме дозвола дека можат да градат верски објект и во него да ја практикуваат верата, да клањаат да вршат намаз, но ние не сме тие што издаваме дозволи за градење, тоа го прават институциите, ни изјави Ферати, додавајќи дека верата на овие луѓе е на линија на едно од учењета до кое се држи и ИВЗ, а тоа е ,,Ханефиски Месхеп”.
Од општина Карпош вчера излегоа со соопштение во кое информираат дека им дале рок на претставниците на џамијата во Злокуќани 15 дена сами да ја срушат бесправната градба и дека во спротивно случајот ќе биде пријавен во државниот инспекторат за градежништво и урбанизам.
Од џамијата се држат до имотниот лист, но не кажуваат дали градат врз основа на дозвола за градба , за што од општина Карпош се децидни дека ја немаат издадено.
Во меѓувреме партијата „Левица“ информира за уште една нелегална градба на џамија, но овој пат на локација во скопско Нерези.