Според последните анализи кој ги подготвивме со помош на најпрецизните нумерички модели, големо заладување и нешто повеќе врнежи не се очекува ниту во ноември месец. Така е барем според сегашните анализи, а промени во прогнозата секако дека се можни, вели за НоваТВ метеорологот Славчо Попоски.
„Месец ноември ќе помине во знакот на натпросечно и сушно време. Не се очекуваат некои многу интензивни врнежи кои би довеле до крај на сушата која е настаната во Македонија. Температурите ќе бидат натпросечно високи, што значи дека ќе бидеме под влијание на јужно и релативно топло воздушно струење“, посочува тој.
„Секако и покрај ова очекуваме повремени разладувања на времето, но и тоа не би било нешто посебно и значително. Не барем според моменталните анализи. Ако вака останат работите на нумеричките модели, пролетните температури продолжуваат и во месец ноември а за зима ќе почекаме во декември“, дополнува Попоски.
Тој вели дека освен во Македонија, натпросечно топло време ќе има и целиот регион но и целиот Европски Континент.
Сепак, вели метеорологот Попоски, со оглед на тоа дека се работи за долгорочно анализирање на времето, промени во прогнозата и тоа како се можни. Затоа добро би било граѓаните да ги следат нашите секојдневни анализи на времето, со цел да бидат навремено информирани за евентуално пристигнување на зимските температури но и на првиот снег на пониските места.