Двајцата анестезиолози се отстранети од работи од КАРИЛ, а на едниот од нив не само што му се заканува суспензија туку ќе мора да врати и 50 000 евра на државата бидејќи специјализирал со кофинансирање
До крајот на неделата се очекува да биде готов наодот од обдукција кој треба да покаже која е причината за смртта на родилка Дебора Џамбази, дознава НОВА од извори кои го испитуваат случајот. Нашите извори велат дека се собрани изјави од сите инволвирани во случајот со родилката која почина во приватната болница Санте Плус и на почетокот на идната недела се очекува Министерството за здравство да излезе со извештај за причината за смртта на младата жена.
Двајцата анестезиолози се отстранети од работа од КАРИЛ додека не заврши со работа комисијата која го истражува случајот. На едниот од нив не само што му се заканува суспензија или одземање на лиценцата, туку ќе мора да врати и 50 000 евра на државата бидејќи специјализирал со кофинансирање, дознава НОВА од извори од Хируршките клиники.
Анестезиологот кој пред една година завршил со специјализација се обврзал со договор, десет години да работи во јавно здравство, во спротивно треба да ги враќа парите со кои му било овозможено да специјализира. Тој во тимот во Санте Плус при операцијата со царски рез бил нелегално, бидејќи немал обврзувачки договори со болницата, а не ги исполнувал ниту условите за да работи дололнително во друга болница, велат на Хируршките клиники.
Според Законот за здравствена заштита докторот кој сака да врши дополнителна дејност во друга болница мора да има договор со болницата каде што сака да врши дополнителна дејност, потоа двете болници да имаат договор меѓу себе, како и лекарот да има согласност од директорот каде што работи, во овој случај од ТОАРИЛУЦ.
„Не можел да има договор без да знам, а јас такво нешто не сум потпишал. Ќе покренеме се што е во наша надлежност за да се испита целиот сплет на околности кои довеле до смрт на родилката“, изјави за НОВА др. Илир Хасани директор на ТОАРИЛУЦ. .
Родилката, 31 годишната Дебора Џамбази почина пред десттина дена при породување со царски рез во болницата Санте Плус, а раководството од болницата тврди дека починала на КАРИЛ каде што ја однеле со брза помош. Извештајот на КАРИЛ пак, покажува дека жената била донесена почината. Нејзиното бебе во тешка состојба, без пулс и без дишење е пренесено на Клиниката за детски болести и се уште е на одделот за интензивна нега.
Младата жена, познат стоматолог од Кичево на која ова и било прво породување бидејќи се лекувала од стерилитет, отишла да се породи во приватната болница Санте Плус (каде што не била лекувана или следена претходно)и при вовед во целосна анестезија со царски рез при ставање на тубусот и се зaтвориле дишните патишта, а анестезиологот при сите напори не успеал да ги ослободи за да може да дише.