Вкупно 15 директори се разрешени или сменети во јавните здравствени установи, од кои пет на скопските клиники, дознава НОВА од извори во Министерството за здравството. Дел од нив се разрешени и прераспоредени на други пониски работни места, а дел се распоредени како директори на други клиники.
На некои од испразнетите места се носат луѓе од надвор, велат нашите извори. Нема објаснување од Министерството за здравство на што се должи смената на директорите кои се задолжени за економски прашања во болниците и покрај тоа што прашањата беа упатени и писмено и усно.
Овие директори беа поставени да менаџираат со буџетите на болниците и заедно со стручните, односно медицински директори имаа врзан потпис во однос на сите плаќања и договори. Но, речиси сите болници тонат во натрупани долгови. Тие во изминатиот период праќале податоци за работењето на установите каде што менаџираат, но велат дека не знаат која е причината за нивната смена.
Веста дека се разрешени кај дел од нив стигнала во четвртокот и тоа во форма на писмено известување. Внатре не им било образложено кои се причините за нивното разрешување. Тие посетувале курс за менаџери во траење од 2-3 недели, по што полагале комјутерски. Некои од нив не го поминале нивото.
НОВА дознава дека на Клиниката за рентгенологија е назначен директор кој претходно работел во Охридска банка, а претходниот е распореден да менаџира со Клиника за ендокринологија.
„Во четвртокот добив известување дека сум сменет и еве сега сум распореден на ендокринологија. Ние бевме вд. директори и мандатот ни истече во септември. Имаше распишано конкурс, а посетувавме курс за менаџери. Има и такви кои не ги поминаа тестовите“, изјави кратко Гоце Вељановски, екс директор на Ренгенологија.
Која е причината за смените, сега пред избори останува нејасно. Лекарите пак, прашуваат што ќе биде со медицинските директори со кои менаџирале заеднички, дали тие ќе бидат разрешени.
„Која е улогата на економските директори не знаеме. Тие како да се тука само да трупаат и распоредуваат партиски кадри“, велат лекари на една од скопските клиники.
Реформите со два директори, со врзан потпис не ги дадоа очекуваните резултати. Напротив болниците потонаа во долгови, а економските директори се нагрдени со плата од 70 000 денари, што заедно со придонесите државата ја чинат над 100 000 денари. За разлика од нив медицинските директори земаат 40 000 денари плата.
Иако во 2009.та година им беа простени долговите болниците веднаш генерираа нови долгови што покажува и анализата на НОВА.
Ситуацијата годинава е уште пострашна и е катастрофална. Болниците се во огромни долгови, голем дел од нив се со блокирани сметки. Вработените примаат плата, но нема пари за лекови и медицински материјал, за чаршави и пижами за болните. Долговите на Ортопедија, Трауматологија, Анестезија и Интензивно лекување достигнаа до пет милиони евра, Трансфузија должи три милиони исто колку што должи прилепската болница, која е со блокирана сметка. Слична е ситуацијата и во другите клиники и болници во државата.