Во даденото прво интервју за Ен-Би-Си, Едвард Сноуден рече дека работел на сите нивоа, од основни работи, па се до врвни позиции, за ЦИА и НСА.
Сноуден во интервјуто се бранеше од тврдењата со кои се негира неговото шпионско искуство, во периодот пред да ги украде и објави доверливите документи на НСА.
-Обучуван сум како шпион во традиционална смисла и работев како таен агент во странство, преправајќи се дека работам некоја друга работа, и тоа под име кое не е мое, туку употребував кодно име рече тој.
Сноуден истакна дека работел како технички експерт и предавач за ЦИА и НСА како и за ДИА (Defense Intelligence Agency).
-Јас не работев со луѓе, ниту врбував агенти. Моја задача беше да овозможам системот да работи за САД. И тоа го работев на сите нивоа, почнувајќи од основните работи до врвните. Така, кога некој ќе каже дека едвај сум бил службеник, дека не го познавам тоа што го зборувам, јас тврдам дека тоа се прави намерно за да се доведе јавноста во заблуда, нагласи тој.
Сноуден инаку, за германски „Штерн“ најави нови шпионски откритија за Германците и рече дека тој лично во американската НСА, се занимавал со комуникациите со Германија.
-Јасно речено-уставните права на секој Германец се повредени, рече тој.
-Германските тајни служби работат рака под рака со Американците….очигледно сакаат да се кријат фактите за да не ја вознемират јавноста, рече Сноуден, кој од германските политичари побара појасно да се изразуваат за темата-шпионажа и да се ангажираат на заштита на приватната сфера.
По прашањето за азилот во Русија, на кој рокот му истекува, Сноуден рече дека би сакал да помине време во Германија.