Повикот да се воведе поцврста контрола на работата на државните разузнавачки агенции покажува дека исправно постапив кога ги обелоденив методите и целите на американските тајни служби, оценува Едвард Сноуден.
Поранешниот вработен во Националната агенција за безбедност, порано годинава откри дека НСА низ целиот свет спроведува тајна програма за шпионирање на интернет и телефонските комуникации, а на мета биле многу од светските лидери, вклучувајќи ја и германската канцеларка Ангела Меркел.
Во тесктот насловен „Манифест за вистината“, кој денес го објави германскиот весник „Шпигл“, Сноуден наведува дека актуелната дебата во многу од земјите, за масовниот надзор на комуникациите, покажува дека неговите постапки допринеле да се воведат извесни промени.
„Сега е јасна корисноста која ја има општеството од новите сознанија, бидејќи се предлагаат реформи во политиката, надзорот и законите“, изјави поранешниот службеник во ЦИА и НСА.
Додека едни сметаат дека Сноуден е борец за човекови права, други гледаат на него како предавник-крадец на информации од НСА.
Во отвореното писмо испратено до Германија, минатата недела, Американец наведе дека смета на поддршка од меѓународната заедница, со што би се спречило да биде прогонуван од Вашингтон.