Поранешниот американски разузнавач, Едвард Сноуден, побарал привремен азил во Русија, потврди неговиот руски адвокат.
Адвокатот Анатоли Кучерен потврди дека Сноуден кој повеќе од три недели се наоѓа на московскиот аеродром „Шереметјево“, аплицирал за привремен азил, иако американецот неколкупати нагласуваше дека бара престој во Латинска Америка.
Еден од функционерите на Федералната служба за миграција е повикан на најголемиот руски аеродром со оглед на фактот дека Сноуден не смее да ја напушти транзитната зона.
Поранешниот разузнавач на Националната агенција за безбедност, поради тој факт поднел барање за привремен азил и му го предал на службеникот.
Претходно, светските агенции пренесуваа дека Сноуден на состанокот со руските и меѓународните организации за човекови права, кој се одржа на аеродромот, предупредувал на неможноста да „лета“ за Јужна Америка и поради тоа сака да остане во Русија.
Рускиот претседател Владимир Путин вчера изјави дека Едвард Сноуден ќе ја напушти Русија, кога пред него ќе биде отворена таква можност.