Процесот за конечно решавање на проблемот со илјадниците тони отпад од опасниот пестицид линдан во поранешната фабрика Охис, ќе го води Генералниот Секретаријат на Владата на Република Македонија.
Според, генералниот секретар Драи Рашковски, можни се три решенија за трајно решавање на проблемот за чија реализација ќе бидат потребни од 40 до 260 милиони евра.
„Во зависност од собраните средства ќе зависи изборот на методот кој ќе го користиме за уништување на отпадот од опасниот пестицид линдан. Сакам да истакнам дека истовремено ќе се чистат двете депонии во поранешната фабрика Охис и очекуваме дека тој процес ќе трае од 3 до 5 години“, истакна Рашковски.
Премиерот Зоран Заев во име на Владата денеска го потпиша Меморандумот за соработка со Канцеларијата за услуги на проекти на Обединетите нации – UNOPS и со Министерството за надворешни работи на Кралството Норвешка претставувано од Амбасадата на Кралство Норвешка за Србија, Македонија и Црна Гора.
„Веќе е познато дека одредена количина од овој опасен пестицид со години е затрупан во кругот на фабриката и претставува закана за животната средина. Република Македонија, со потпишување на Стокхолмската конвенција во 2004-тата година, во којашто линданот како токсична материја е додаден во 2009-та година, e обврзана да го реши овој проблем. И затоа час поскоро мора да го дислоцираме отпадот без последици врз околината и врз граѓаните“, истакна премиерот Заев.
Успешната имплементација на Проектот има за цел создавањето на заеднички Фонд, како системски механизам за расчистување на индустрискиот токсичен отпад во поранешната фабрика ОХИС во согласност со Европските стандарди, хармонизација во полето на заштита на животната средина и промоцијата на Град Скопје како безбеден, отпорен и одржлив град.
Амбасадор на Кралството Норвешка за Македонија, Србија и Црна Гора Арне-Санес Бјорнстад истакна дека неговата земја е задоволна што може да и помогне на Република Македонија за да ја дислоцира најцрната еколошка точка во земјата. Истакнувајќи дека безбедноста на граѓаните е на прво место, амбасадорот Бјорнстад посочи исто така овој процес дополнително ќе го олесни патот на Република Македонија во Европската Унија.