Човечкиот капитал е исклучително важен за секоја земја и вложувањето во истиот треба да биде одговорност за секоја Влада, но и пошироко, да постои општоприфатен консензус за структурните реформи во оваа област. Ова било истакнато на онлајн состанокот на министерот за финансии, Фатмир Бесими, министерката за труд и социјална политика, Јагода Шахпаска, министерката за образование и наука, Мила Царовска, како и претставници од канцеларијата на претседателот на Владата и од Министерството за здравство со директорот на Светска банка за Северна Македонија, Масимилијано Паолучи, и експертски тим на Светската банка.
На состанокот се дискутираше за начинот на отпочнување на „Стратегија за развој на човечкиот капитал“, како еден од приоритетите на Владата, особено во пост ковид периодот, соопштија од Владата.
Инвестициите во човечки капитал се во центарот на „Стратегијата за раст и развој“, истакна министерот за финансии Бесими и посочи дека инвестирањето во човечкиот капитал е еден од столбовите на кои се заснова „Стратегијата за ревитализирање и паметен раст (Smarter Growth)“, со која ќе се постигне забрзување на економскиот раст на среден рок, а воедно ќе се постигне негова одржливост.
„Од исклучително значење е создавање и промовирање на еднакви можности, развој на човечките ресурси преку инвестиции во образованието, науката и здравството, поттикнување на поголема активност на работоспособното население и социјална заштита и социјално осигурување. Со вложување во човечкиот капитал и паралелно дејствување кон заздравување од ковид кризата, поттикнување на одржлив и инклузивен раст и подобрување на конкурентноста на приватниот сектор, стапките на економски раст кои порано се движеле од 2-2,5 отсто на среден рок можат да достигнат 4-5 отсто“, посочи Бесими.
Министерката Шахпаска истакна дека Министерство за труд и социјална политика ги адресира предизвиците на ранливите категории на граѓани, особено во услови на пандемија.
„Имавме можност да ја тестираме социјалната реформа донесена 2019 година и нејзината успешност и првите резултати ги видовме за време на кризата. Тоа искуство ни потврди дека сме на вистинскиот пат во правењето промени во општеството, преку поддршката на ранливите категории на граѓани. Имавме одлична соработка со Светска банка во делот на предучилишното образование и воспитување, социјално ранливите категории, младите лица, но и во поддршката на старите лица преку социјалните услуги”, посочи Шахпаска.
Министерката Царовска посочи дека образованието е клучно во градење на човечкиот капитал.
„Преку образовниот процес создаваме идни генерации кои треба да го градат, водат и развиваат нашето општество. Образованието е основа за создавање на квалитетен човечки потенцијал и Министерството за образование и наука и државата постојано ќе вложува во него“, рече Царовска.