Со потпис од 20 пратеници Талат Џафери од ДУИ е предложен за кандидат за претседател на Собранието, информираше пратеникот од СДСМ Петре Шилегов, според кого, апсурдно е да се држи во заложништво работата на Собранието од страна на ВМРО ДПМНЕ, со постојани меѓусебни реплики.
-Граѓаните се сведоци за зложничкото однесување со кое ВМРО ДПМНЕ го крши Деловникот. Ова е страв и избегнувње на одговорноста за криминалот. Се работи за дрско и безобразно кршење на Деловникот, што парламентарното мнозинство има обврска да не го дозволи, изјави Шилегов, дополнувајќи дека токму затоа 20 – мината пратеници поднеле иницијатива за избор на Талат Џафери за спикер на Собранието.
Шилегов рече дека надвор од секоја логика е Илија Димовски кој треба да биде претседател на Комисијата за избори и именувања сам да го кочи сопствениот избор и да се заврши со таа точка и да се премине на избор на претседател на Собранието.
Илија Димовски од ВМРО ДПМНЕ, пак, ги обвини пратениците од СДСМ за арогантност, бидејќи, како што рече, изминатите денови повикувале на дебата, а сега се изолирале од неа.
-Проблемот е што СДСМ не сакаат да дебатираат за Законот за јазици, за Платформата и јасно и отворено да одговорат за други работи рече Димовски.
На прашањето на НОВАТВ со кого изминативе три часа дебатираат пратениците на ВМРО ДПМНЕ, Димовски одговори дека тоа било „дебата со граѓаните“.
Тој појасни дека тоа што СДСМ го поддржале со 20 потписи Талат Џафери да биде кандидат за собраниски спикер, не значи дека во продолжението на седницата други дваесет пратеници нема да предложат и други кандидати.