Социјалистичката партија предводена од Еди Рама води во резултатите од парламентарните избори одржани вчера, по преброени 15 отсто од гласовите, соопштија изборните власти во Албанија.
Според првични резултати од Централната изборна комисија на вчерашните паралментрани избори гласале 53 отсто од вкупно 3,3 милиони гласачи во државата.
По завршувањето на изборниот ден и Сали Бериша и Еди Рама прогласија победа на изборите. Конечните резултати од изборите, осми по ред по паѓањето на комунизмот, според локални медиуми нема да бидат објавени до утре.
Инаку изборите ги следеа низа нерегуларности и обвинувања за купување на гласови. На денот на изборите беше убиен контролорот на албанското Социјалистичко движење за интеграција, а тројца други беа повредени во престрелка во близина на избирачко место во една гимназија во градот Лач.
Еден од ранетите е кандидат од Демократската партија на премиерот Сали Бериша, а до пукање дошло по конфликтот меѓу приврзаниците на Демократите и на опозициското Социјалистичко движење за интеграција на Еди Рама.
Беше нападната и екипата на тиранската телевизија Топ-Чанел која го следела изборниот процес во албанскиот град Лач. На снимателот му била искршена камерата бидејќи снимал како група на луѓе им се заканувале на гласачите дека нема да може да гласаат ако се за левицата.
Еден ден пред гласањето, Централната изборна комисија остана парализирана, без напредок во обид да замени три од седумтте члена на Комисијата.
Членовите поднесоа оставка во април во текот на еден спор меѓу владејачката коалиција на конзервативниот премиер Сали Бериша и опозицијата предводена од социјалистите со Еди Рама.