Турската полиција употреби солзавец за да ги растера демонстрантите во Истанбул и Анкара на првата годишнина од анти-владините протести.
Околу 25.000 полицајци се распоредени во Истанбул на плоштадот Таксим , епицентарот на демонстрациите минатата година.
Премиерот Реџеп Тајип Ердоган претходно побара младите луѓе да не се приклучуваат на денешните протести.
.jpg)
Покрај Истанбул, организацијата Солидарност со Таксим, повика на масовни протести и во Анкара, Измир, Антакија и други градови.
Полицијата досега привела 32 демонстранти, кои се обиделе да стигнат до истанбулскиот плоштад Таксим, соопшти весникот на англиски јазик „Хуриет дејли њуз“.
Група млади се обиделе да организираат протестна акција и пред влезот на паркот Гези, седнале на влезот и почнале да читаат книги кога биле протерани од полицијата,јавува ИТАР-ТАСС.
Активистите во Истанбул на граѓаните им делеа маици со натписот „Гези – една година“.
.jpg)
„
Хуриет дејли њуз“ информира дека членовите на турската Заедница на лезбејки, хомосексуалци, бисексуалци и транссексуалци излегле на улиците на Истанбул со намера да стигнат до плоштадот Таксим.
По улиците на мегаполисот се собираат и фановите на фудбалскиот клуб Бешикташ.
Група архитекти и еко-активисти, кои се против плановите за реконструкција на паркот Гези, посочија дека ќе организираат протестна прошетка до Таксим и покрај забраната на властите, јавуваат странските медиуми.
Турската полиција утринава го блокира пристапот до Таксим, а во попладневните часови беше затворен и паркот Гези, што се наоѓа до плоштадот.
Весникот „Хуриет“ посочува дека полицијата ги привела и дописникот од Турција на американската телевизија Си-Ен-Ен Интернешенел Ајван Вотсон и неговата екипа, додека во живо известувале од плоштадот Таксим.