– Согласно најавените активности од страна на Социјалдемократскиот сојуз, советничката група на СДСМ и коалицијата во град Скопје, во знак на солидарност кон Мирослав Шиповиќ, нема да присуствува на утрешната седница на град Скопје, соопшти денеска за НОВА, координаторот на СДСМ во Град Скопје, Софија Куновска.
Според Куновска, недозволиво е Премиерот преку институционално насилство да го преземат функционирањето во општина Центар. Притворот на Шиповиќ, смета Куновска, е политички монтиран процес.
Таа нагласи дека СДСМ бара судот да го ослободи претседателот на Советот на општина Центар и да му дозволи тој да се брани од слобода.
Куновска ја повикува власта да не врши притисок врз судовите во Македонија, и да не им налага однапред донесена пресуда за Шиповиќ.
Оваа одлука на советничката група на СДСМ доаѓа откако претседателот на партијата, Заев, неодамна изјави дека неговата партија нема да дозволи демонстрација на сила и моќ од страна на владејачката партија, и дека СДСМ ќе го стави во мирување учеството во работата на собраниската комисија за имплементирање на заклучоците од Комисијата за 24-ти Декември, како и тоа дека градоначалниците на СДСМ ќе го стават во мирување своето членство и активности во ЗЕЛС, а советниците на СДСМ во сите совети на општини во Македонија во знак на солидарност со колегите од Центар, нема да присуствуваат на првата наредна седница на Советот на нивната матична Општина, објасни неодамна Заев.
Министерството за правда веќе ја почна постапката за екстрадиција на Мирослав Шиповиќ кој беше уапсен на аеродромот во Виена на 15 октомври, потврди министерот за правда Блерим Беџети.