Усвоена е Резолуција за хуманитарната криза во Сирија, откако Советот за безбедност на Обединетите нации синоќа првпат беше единствен по ова прашање, и со неа се бара сириската Влада и опозицијата веднаш да обезбедат пристап за хуманитарните конвои.
Русија, најблискиот сојузник на Сирија, како и Кина, одлучија да се придружат на 15-члениот СБ на ОН во испраќањето на острата порака, пред се до режимот на Башар ал Асад, дека храната, лековите и другите неопходни работи не смеат да бидат блокирани.
Русија и Кина претходно три пати го блокираа усвојувањето на резолуцијата во СБ, со која западните земји сакаа да извршат притисок врз Асад за завршување на конфликтот.
Резолуцијата не предвидува санкции.
Со документот се бара сите страни, посебно сириската Влада, што побрзо да „овозможи брз, безбеден и непречен пристап… преку линиите на конфликтот и преку границата“ за хуманитарната помош и ги повикува двете страни „веднаш да ги прекинат опсадите на населените места“.
– Хуманитарната помош не е нешто за што се преговара, тоа е нешто што мора да биде овозможено врз основа на Меѓународното право…шок е што двете страни ја користат тактиката опсада на цивилите, истакна генералниот секретар на ОН , Бан Ки-мун.
Тој посочи дека околу 200.000 луѓе се под опсада на владините сили, а 45.000 под опсада на бунтовниците.