– Истрагата има свој почеток, свој тек и крај кога ќе се обезбедат сите неопходни докази. Со самиот факт дека во оваа истрага се вклучени стратешките партнери укажува на комплексноста на обезбедувањето на доказите, вели министерот за внатрешни работи Оливер Спасовски во интервју за Канал 5.
Во однос на тоа дека акцијата е забрзана по реакцијата на опозицијата тој прашува дали е можно преку ноќ да се заврши една целосна ваква опсежна акција и да се пристапи кон реализација веќе наредниот ден?
– Очекувам дека ќе реагира и јавното обвинителство и да видиме што практично стои зад сето ова. Кој е интересот зад сите овие активности, додава министерот за внатрешни работи.
Спасовски соопшти и дека оној дел од истрагата кој што ги обезбеди сите потребни докази е завршен со приведувањето и апсењето на припадниците на македонската полиција. Во моментов се работи и на меѓународно ниво за да се види каде и како се движеле сите овие текови. Секоја анализа и секој доказ кој што произлегува од спроведувањето на оваа акција ќе се анализира и врз оснбова на тоа ќе се проширува и ќе се води истрагата понатаму.
– Преку документирање на процесот кој што се води повеќе од една година заокружени се оние кои што директно се одговорни за криминалното издавање патни исправи. Пред месец и половина имавме и друга таква акција во која што исто така една група на вработени кои што се занимавале со издавање лажни возачки дозволи беше сузбиена и секако дека во секоја од групите постои некој кој што бил на врвот на таа група. Имаме и контролор и овластени службени лица кои што директно учествувале во овој дел. Секое едно лице за кое што се обезбедени докази е приведено, вели Спасовски.
Тој додава дека голем број работни информации се познати и предадени на обвинителството, други детали не може да изнесува бидејќи истрагата е во тек. Најважно е како што посочи тоа што истрагата се води неселективно и транспарентно за да можеме да ги обезбеди сите и докази и лица што учествувале во една ваква работа, со цел да се стави крај на било какви криминални дејанија.