„Нашата програма се базира пред сè и стои на столбови кои се срушени во овој момент во Република Македонија. Еден од главните носечки столбови е да ја вратиме средната класа во Република Македонија и затоа има многубројни мерки во делот на економијата, во делот на социјалата, коишто гарантираат враќање на средната класа, а со тоа гарантираат и стабилност на ова општество“, изјави во Струмица, Оливер Спасовски, Секретар на СДСМ.
– Една од мерките е повратокот на 15% ДДВ за секој граѓанин во Република Македонија и создавање можност за тринаесетта плата или тринаесетти надоместок на секој граѓанин којшто е во Република Македонија. Исто така, една од значајните мерки е и моделот за воведување социјална пензија за сите граѓани кои се социјално необезбедени, коишто немаат услови за стекнување пензија, како и создавање можност за двојни услови за стекнување пензија покрај старост да биде и со стаж.
– Исто така, вториот на којшто и идната Влада на Социјалдемократскиот Сојуз на Македонија, предводена од Зоран Заев, ја темели програмата е да вложуваме во иднината, а не во минатото. Мислам дека Општина Струмица е пример за тоа како се вложува во иднината и во идните генерации, како се создава атмосфера на убав живот во Струмица, тоа ќе го преселиме заедно со новата Влада на Социјалдемократскиот Сојуз на Македонија и на ниво на Република Македонија. Сите пари, покрај тоа што ќе знаеме транспарентно да го градиме и носиме буџетот, ќе се знае како ќе бидат потрошени и за кои проекти. Нема да се вложува во проекти кои ќе значат само земање на проценти на поединци од власта, туку одговорно трошење, домаќинско трошење на парите. При тоа, создавање услови кои ќе значат гаранција за иднината на младите генерации, објасни Спасовски.
На крајот Спасовски истакна дека еден од најважните столбови кои недостасуваат на македонската држава, а тоа е да ги спречиме поделбите. Македонија е општество кое е поделено по сите сегменти на општественото живеење, и по етничка, и по национална, по верска, по политичка, по културна и по секаков друг вид на димензија. Мислам дека она што се случува со промоцијата на позитивните мерки, оваа власт покажа дека преку такви механизми сака да ги сруши позитивните работи за Македонија. Инцидентот што се случи вчера во Скопје, преку директен напад на луѓе во автобуси, нема друга причина отколку да преку едни такви спинови се минимизираат овие мерки кои се иднина за граѓаните на Република Македонија.