Аналитичарите ги отфлаат шпекулативните најави за предвремени избори на есен, а особено за можноста ДПА да ја замени ДУИ во владата. Оценката е дека врската на ВМРО-ДПМНЕ и ДУИ во меѓувреме прерасна во стабилен „брак“, објавува Дојче веле.
Изјавата на премиерот Груевски дека „се влошени односите со ДУИ”, ја разработи берзата на прогнози за иднината на владината коалиција.
>>Бујар Османи: ДУИ останува во владата на Груевски
Кај поголемиот дел од нив преовладува ставот дека ова е само партиско дефиле за презентирање на маневарските можности на ВМРО-ДПМНЕ, пред се, како „дисциплинска лекција” за превенција од ново „Слупчане”. Според нив, реториката е веќе видена, односно се работи за уште една бенигна епизода од серијата „топло-ладно” која стана заштитен знак на владината коалиција. Заменик-претседателката на СДСМ, Радмила Шекеринска, смета дека јавноста е веќе заморена од таквата игра.
„Таа игра е веќе видена и добро прочитана. Дополнително, при секој дипломатски и политички пораз Груевски мора да ја промени темата и најзгодно му е да се справува со внатрешните и надворешните непријатели: ред странци, ред опозиција, а одвреме навреме и со партнерите. Откако ќе ги разменат политичките шлаканици, како ништо да не се случило – ќе отидат на седница на владата и братски ќе соработуваат”, прогнозира таа.