Српската влада по состанокот на Секретаријатот на ЦЕФТА ќе одлучи дали ќе го ограничи увозот на домати и вина од Македонија пишуваат српските медиуми.
Седницата ќе се одржи на 22 јули во Белград, а состанокот е свикан на барање на министерот за трговија Расим Љалиќ кој минатата недела испратил писмо до Секретаријатот на ЦЕФТА со итно барање да се одржи вонредна седница заради мерките кои ги воведе Македонија со кои е прекршен договорот на ЦЕФТА.
Секретаријатот на Цефта ќе распарава за одлуката на Владата на Македонија за ограничување на увозот на пченица и брашно од Србија јавува агенцијата БЕТА. Србија сеуште нема воведено никакви официјални мерки против Македонија.
Владата на северниот сосед најави мерки на реципроцитет доколу во наредните шест дена не се реши проблемот со ограничувањето на увозот на пченица и брашно од Србија во нашата земја.
Како што најавија од српската влада во случај да не се реши спорот, ќе биде ограничен увозот на домати и вино од Македонија. Мерките на македонската влада со кои за килограм увезена пченица, домашните увозници треба да купат три килограми домашно брашно, а за килограм брашно од Србија да купат четири килограми домашна пченица почнаа да се применуваат од 1 јули.
Вчера на границата со Србија беше доста тензично, во очекување што ќе се случува како што вчера објави НОВА. Македонските гранични инспектори беа на границата, но како што јавија српските медиуми од српска страна биле вратени неколку пратки со домати од Македонија. Од владата на нашиот северен сосед одговорија дека нема никакви официјални мерки за забрана, туку дека станува збор за единичен, изолиран случај.
Одлуката на македонската влада за ограничување на увозот на пченица и брашно предизвика бура од реакции во Србија.
-На Македонците треба да им покажеме заби” изјавил секретарот на Здружението на земјоделските комори на Војводина, Џорџе Бугарин коментирајќи ја одлуката на македонската Влада.
На најавата за ембарго на македонските домати и вино од страна на Србија, реагираат во асоцијацијата на земјоделци во Македонија, а тоа предизвика незадоволство и акј сосптвениците на винариите.
-Доколку Србија го ограничи увозот на домати тоа ќе биде голем удар за земјоделството, а последиците ќе ги сносат производителите бидејќи најголемиот извоз на патлиџани е токму во Србија, Хрватска и Косово изјави за НОВА Ристо Велков од регионалниот Сојуз за земјоделство.
-Таков реципротитет ќе преставува сериозен удар за извозот на македонското вино во Србија. Последиците што во таков случај би се почувствувале во сегментот на винопроизводтсвото во земјава, никако не би смееле да се потценат земајќи ја во предвид големината на уделот за учеството на македонското вино на српскиот пазар реагираат од винарија Камник.
Од винаријата сметаат дека македонските институции треба да ги земат во предвид сите фактори при донесувањето на одлуките за понатамошните чекори во врска со регулирањето на односите меѓу конкретните пазарни сегменти на двете земји, а при тоа да обезбедат максимални можности за успешен пласман на нашите вина во соседна Србија.
-Се надеваме дека овој бран на неизвесност набргу ќе не одмине без последици велат од винаријата Камник.
Од Министертвото за земјоделство велат дека не побарале никакво објаснување од српската влада за новонастанатата ситуација, бидејќи како што велат -нема причина за такво нешто.