Одлуката за тоа дали Србија ќе воведе противмерки за Македонија, поради условен увоз на пченица и брашно од Србија, најверојатно ќе биде донесена идната недела. Како што објави Б92, ова е соопштено од српското Министерство за трговија.
“Србија во петок на 16 август, од Македонија официјално побара да одговори дали ќе ја укине спорната одредба, но се уште нема повратна информација. Настојуваме тоа да се реши со дипломатски притисоци“, истакнала помошник министерот за трговија, Бојана Тодоровиќ.
Таа рече дека укинувањето на уредбата на македонската влада за условен увоз на брашно и пченица од Србија или евентуелното воведување контрамерки не е прашање само за Министерството за трговија, туку за целата српска влада и дека одлуката за тоа би можела да биде донесена идната седмица, кога ќе заврши реконструкцијата на владата.
Мерката, која беше воведена на 1 јули, според која македонската Влада го ограничи увозот на брашно и пченица од Србија, предвидува дека за еден килограм на увезената пченица, македонски увозниците треба да купат три килограми домашна, а за килограм увезено брашно 4 килограми домашно жито.
Според податовите на Министерството за трговија, Србија во Македонија годишно извезува околу 50.000 тони пченица и меѓу 30.000 и 40.000 тони брашно.