Средбата помеѓу премиерот Никола Груевски и лидерот на СДСМ, Зоран Заев во Влада само што заврши и како што известува репортерката на НОВА, Сашка Цветковска, изјави не биле дадени, ниту пак на камерите им било дозволено да ја снимаат средбата.
Соопштено е дека двата кабинети ќе испратат услогласено, заедничко соопштение, во кое ќе ја информираат јавноста за детали од средбата.
Според најавите, средбата се однесува на усогласување на ставовите за Анкетната комисија околу инцидентот на 24 декември.
Како што веќе објави НОВА, во Македонија пристигнува меѓународниот експерт набљудувач на работата на Комисијата која ги истражува причините за инцидентите во Собранието од 24 декември минатата година.
Во текот на наредната недела се очекува членовите на Комисијата да се изјаснат за предлозите на меѓународниот експерт набљудувач кои се изготвени од негова страна како компромисни и кои би требало да ги задоволат барањата на двете страни.
Овие предлози се однесуваат на констатациите и препораките од извештајот на Комисијата за отстранувањењето на пратениците и новинарите од собраниската сала како и на прашањата поврзани со етичкиот кодекс.
Како што дознава НОВА во предлозите на белгискиот експерт набљудувач констатирана е повреда на Уставот.
Резултатите од работата на Комисијата се очекуваат и во Брисел од каде што во повеќе наврати предупредија дека од успехот на работата на Комисијата зависи и тонот со кои ЕК ќе го пишува новиот Извештај за напредокот на Македонија кој ќе биде објавен на почетокот на октомври.
Во некои од предупредувањата на Брисел не се исклучува ниту можноста Македонија да ја загуби препораката за почеток на преговри за членство во ЕУ.
Фото: Архива