Министерот за надворешни работи на Република Србија Никола Селаковиќ, претседателката на Република Српска Жељка Цвијановиќ, амбасадорите на Србија и на Босна и Херцеговина во земјава, Невена Јовановиќ и Драган Јаќимовиќ и почесниот конзул Владимир Стајиќ, денеска се сретнаа со претседателот на државата Стево Пендаровски во рамките на активностите поврзани со националниот празник на Србите а со тоа и на српската заедница во Северна Македонија, Ден на Свети Сава.
Како што е веќе познато вечерва со почеток во 19 часот во Македонскиот национален театар ќе се одржи свечена Светосавска академија, на која свои обраќања ќе имаат високите гости од Република Србија и од Република Српска Селаковиќ и Цвијаниќ и претседателот Пендаровски.
Цвијаниќ активностите во земјава ги почна претпладнето со средба со градоначалникот на Куманово Максим Димитриевски како општина со највисок број на претставници на српската заедница кај нас, на која средба е разговарано за унапредување на соработката покрај во културниот и во делот на економијата.
За време на таа средба како и на синоќешната Светосавска академија во Куманово, беа апострофирани добрите македонско-српски односи и беше нагласена солидната соработка меѓу двете земји и двата народа.