Заразната жолтица нема да го одложи почетокот на новата учебна година. Министерот за образование и наука Абдулаќим Адеми потврди дека нема да има пролонгирање на почетокот на учебната година поради епидемијата од жолтица.
„Засега нема одлука за пролонгирање на учебната година и сметам дека нема да има. Но, доколку се донесе ваква одлука за тоа јавноста ќе биде навремено информирана. Министерството за образование е во контакт со Министерството за здравство и со Институтот за јавно здравје и на последната седница е донесена препорака до сите училишта да преземат дополнителни активности за хигиената со цел да не се зарази некој од учениците, изјави минстерот Адеми.
Бројот на заболените од жолтица постојано се зголемува. На Клиниката за инфективни болести се хоспитализирани 16 пациенти, за време на викендот хоспитализирани се шест нови болни, со што бројот на заболени од 66 се зголеми на 72 случаи. Денеска на клиниката е донесен уште еден сомнителен случај, пациент на возраст од 20 години кај кого болеста се уште не е потврдена.
На клиниката велат дека во последните два месеца драстично е зголемен бројот на пациенти заболени со жолтица.
„ Ние имаме постојано пациенти заболени од ова заразно заболување, но во последните два месеца е зголемен бројот на овие пациенти,“ изјави доктор Снежана Стојковска заменик директор на Инфективната клиника.
Надлежните минатата недела во Штип и Скопје прогласија епидемија на заразна жолтица. Во Центарот за јавно здравје не беа достапни да објаснат зошто дури сега е прогласена епидемија. Зошто е изгубено драгоцено време, без да се предупредат граѓаните и да се дадат препораки како да се заштитат од заразната болест.
Поголемиот дел од заболените немаат основни хигиенски услови и живеат во супстандардни услови, но има и граѓани кои живеат во урбаните населба во солидни услови за живот. Иако не е лоциран извор на зараза надлежните за главен виновник ја посочуваат не хигиената, заради што препорачуваат редовно миење на рацете, како и на овошјето и зеленчукот.