Судиите Мирјана Радевска Стефкова и Зоран Герасимовски денес ќе ги образложат оставките пред колегите од Судскиот совет, а се очекува на седницата да се избере и заменик на Селим Адеми.
Герасимовски е апелациски судија, а Радевска-Стефкова е врховна судијка. Тие пред два дена поднесоа оставки од членство во Судскиот совет.
Судскиот совет во последниот месец е цел на негативни критики и од страна на меѓународната заедница, откако поранешната претседателка Весна Дамева, на 26 април, беше разрешена од функцијата. На седницата на Судскиот совет дојде до расправија кога Дамева одби да стави точка на гласање која ја немаше во дневниот ред. Нејзиниот заменик Селим Адеми повика да се гласа за нејзино разрешување. Го поддржаа седум члена и тој констатираше дека Дамева е разрешена и во нејзино присуство го презеде раководењето со седницата.
По критиките од стручната јавност дека е прекршена процедурата, беше одржана тајна седница на Советот на која беше повлечена одлуката за разрешување на Дамева, повторно беше ставена на дневен ред и беше изгласано нејзино разрешување, а воедно беше избран и нов претседател, Сашко Георгиев. Но со тоа не завршија проблемите, затоа што набргу реагираше меѓународната заедница при што холандскиот амбасадор Дирк Јан Коп изрече остри критики на сметка на состојбите во Судскиот совет и го повлече тековниот грант од еден милион евра за професионализација и подобрување на капацитетите на управувачкото тело на судството. Потоа уследија и новите оставки на двајцата судии.
По нивните оставки, Коалицијата „Сите за правично судење“ ги повика и другите членови да поднесат оставки.
С.К.