Состојбата во регионот на Западен Балкан е загрижувачка. Во последните месеци видовме зголемени тензии во Босна и Херцеговина, меѓу Косово и Србија, а во Република Северна Македонија има политичка нестабилност. ЕУ мора да ги искористи сите достапни алатки за поддршка на внатрешниот политички дијалог во Босна и Херцеговина и правилното функционирање на институциите, изјави министерот за надворешни работи на Бугарија, Светлан Стоев, кој денеска учествува на редовниот состанок на Советот за надворешни работи во Брисел. Стоев се задржа и на дијалогот Белград-Приштина и внатрешно-политичката ситуација во Република Северна Македонија.
Тој истакна дека Бугарија дала предлози за зајакнување на соработката со Западен Балкан во различни области од заемен интерес, вклучително и безбедноста, хибридните закани, стратешката комуникација, илегалната миграција и други.
„Европската интеграција е двонасочна улица која бара посветеност не само од ЕУ, туку и од земјите партнери. Тие мора да се придржуваат до европските вредности, вклучувајќи ги добрососедските односи и почитувањето на човековите права“, нагласи бугарскиот шеф на дипломатијата.