Со нас веќе неможете да манипулирате, ние не им веруваме на вашите лаги, ова денеска и го порачаа на владата на Груевски, земјоделците од струмичкиот регион.
Незадоволни од откупот на тутунот и селективната исплата на штетите од ланските поплави и воопшто од катастрофалната состојба во земјоделството, тутунари, раноградинари и жители од поплавените села, денеска половина час го блокираа магистралниот пат Струмица – Радовиш. Земјоделците се гневни и револтирани од игнорантскиот однос на министерството за земјоделство кон тутунарите и нивните проблеми со откупот на тутунот. Според тутунарите, првите реколти како што се, прва, втора и трета класа не се откупувале на откупните пунктови, а и тоа што се откупувало било по мизерни цени. Тие се плашат дека нема да биде откупен целиот род од ланската реколта.
Земјоделците обвинија и за селективна исплата на штетите од поплавите што го зафатија регионот во февруари минатата година.
-Денес излеговме на протести и против Владата која веќе цела година не лаже дека ќе ги добиеме парите кои ни следуваат како оштета од ланските поплави. Од извршените проценки за штетите од поплавите само дел од партиските војници на власта добија обесштетување, додека најголемиот дел од вистинските и оштетените земјоделци се уште немаат добиено ниту денар, рече Ристо Велков, претседател на Сојуз на синдикат на земјоделски производители.
Од денешната блокада, земјоделците испратија и неколку барања до министерството за земјоделство. Бараат, проценката на тутунот да биде реална, според реалниот квалитет на тутунот, министерот за земјоделство јавно да излезе и да застане на страната на тутунарите и да гарантира дека тутунот од оваа реколта ќе се откупи до последен килограм.
Исто така, упатија апел до откупните компании да ја забрзат динамиката на откуп на тутунот бидејќи тутунарите се без пари, сиромашни и изнемоштени, а со секој поминат ден нивниот тутун губи на квалитет и да не се манипулира со самите тутунари и да започне откупот на целиот род вклучувајќи го и тутунот од првата и втората берба, а од владата побараа да ги исплати парите на сите земјоделци на кои им е нанесена штета од поплавите во февруари минатата година.
Земјоделците обвинија дека по вчерашната најава на денешниот протест бил вршен притисок врз земјоделците да не излегуваат на блокадата.